Fiskalizimi

Fiskalizimi përfaqëson procesin e modernizimit dhe digjitalizimit të administrimit tatimor, nëpërmjet regjistrimit, lëshimit dhe raportimit elektronik të faturave dhe transaksioneve. Ky proces synon të sigurojë një administrim më transparent, të saktë dhe efikas të aktivitetit ekonomik, duke mundësuar transmetimin në kohë reale të të dhënave pranë administratës tatimore.

Fiskalizimi kontribuon në rritjen e transparencës, në përmirësimin e kontrollit dhe monitorimit të transaksioneve, si dhe në lehtësimin e përmbushjes së detyrimeve tatimore nga subjektet. Nëpërmjet këtij sistemi, procesi i faturimit dhe raportimit realizohet në mënyrë elektronike, duke reduktuar përdorimin e dokumentacionit fizik dhe duke rritur sigurinë dhe gjurmueshmërinë e informacionit fiskal.

Për bazën ligjore dhe kuadrin rregullator të fiskalizimit, referojuni informacionit të detajuar në linkun përkatës.

Një faturë fiskalizohet duke u lëshuar nëpërmjet një zgjidhjeje software ose pajisjeje të autorizuar, sipas mënyrës së faturimit që përdor subjekti. Të dhënat e faturës regjistrohen dhe transmetohen elektronikisht në sistemin e administratës tatimore, ku fatura pajiset me elementet përkatëse të fiskalizimit. Më pas, fatura i dorëzohet klientit në formatin përkatës dhe ruhet elektronikisht për qëllime të dokumentimit dhe kontrollit tatimor.

Janë të detyruar të përdorin zgjidhjen e certifikuar të software-it, në formën e një aplikacioni individual, të një sistemi kompjuterik të integruar ose të një aplikacioni Cloud, tatimpaguesit që:

• lëshojnë faturë për furnizimin e mallrave dhe të shërbimeve;
• lëshojnë faturë shoqëruese për transportin e mallrave nga një vend në tjetrin në territorin e Republikës së Shqipërisë, pa ndryshim të pronësisë;
• operojnë në sektorë specifikë të biznesit, sipas vendimit përkatës të Këshillit të Ministrave;
• janë banka, institucione financiare jobankare dhe subjekte të tjera që ofrojnë shërbime pagese të faturave elektronike.

Kategoritë që mund të lëshojnë fatura dhe të kryejnë procedurën e fiskalizimit përmes përdorimit të platformës qendrore të faturave, pa pasur nevojën e pajisjes me zgjidhje software-ike, janë:

1. Transaksione me para në dorë

Tatimpaguesit që lëshojnë fatura për transaksione me para në dorë dhe që përmbushin njëkohësisht kriteret si më poshtë:

• nuk kanë përgjegjësinë tatimore të TVSH-së;
• kanë statusin ligjor “Person fizik” dhe kategorinë e punësimit “I vetëpunësuar i vetëm”;
• nuk kanë më shumë se një vendndodhje të ushtrimit të veprimtarisë së biznesit.

2. Transaksione pa para në dorë

Tatimpaguesit që lëshojnë fatura elektronike për transaksione pa para në dorë dhe që përmbushin njëkohësisht kriteret si më poshtë:

• nuk kanë përgjegjësinë tatimore të TVSH-së;
• kanë statusin ligjor “Person fizik” dhe kategorinë e punësimit “I vetëpunësuar i vetëm”;
• nuk kanë më shumë se një vendndodhje të ushtrimit të veprimtarisë së biznesit.

3. Organet publike

Organet publike qendrore dhe vendore.